Törkiyä Cömhüriyäte tışqı êşlär ministrlığı Törkiyä, Cibuti, İndoneziya, Yordaniya, Fälästin, Qatar, Livan, Mavritaniya, Misır, Paqıstan, Somali, Sudan, Soğud Ğäräbstanı, Oman häm Yämän tışqı êşlär ministrlarınıñ urtaq belderüen bastırıp çığardı.
Belderüdä tübändäge süzlär urın ala: "Törkiyä Cömhüriyäte, Cibuti Cömhüriyäte, İndoneziya Cömhüriyäte, Yordaniya, Fälästin däwläte, Qatar, Livan, Mavritaniya İslam Cömhüriyäte, Misır Ğäräp Cömhüriyäte, Paqıstan İslam Cömhüriyäte, Somali Federal’ Cömhüriyäte, Sudan Cömhüriyäte, Soğud Ğäräbstanı Patşalığı, Oman Soltanlığı häm Yämän Cömhüriyäte tışqı êşlär ministrları güyä Somalilend däwläteneñ yawlap alınğan Qodüs şähärendä güyä ilçelek açu öçen yasağan qanunsız häm qabul itelmäslek adımın iñ qırıs räweştä ğayepli."
Bu adımnıñ xalıqara xoquq häm bäyläneşle xalıqara qararlarnı açıq räweştä bozu buluı, yawlap alınğan Qodüsneñ xoquqi häm tarixi statusın turıdan-turı bozuı urın alğan belderüdä: "Tışqı êşlär ministrları şulay uq, yawlap alınğan Qodüs şähärendä xoquqqa qarşı wazğıyätne tiränäytügä yünälgän yäki xalıqara xoquqqa häm bäyläneşle Birläşkän Millätlär Oyışması qararlarına qarşı kilgän härtörle struktura yäki tärtipkä salunı qanunlaştırunı maqsat itkän härtörle ber yaqlı adımnı kisken räweştä kire qağuların qabatlıylar," – dip äytelde.
Belderüdä ministrlarnıñ Könçığış Qodüsneñ 1967 yıldan birle yaw astındağı Fälästin tufrağı buluın, xoquqi häm tarixi statusın üzgärtügä yünälgän härtörle omtılışnıñ xökemsez buluın häm bernindi xoquqi näticä alıp kilmäyäçägen qabatlawları; şulay uq Somalineñ berdämlege, möstäqil'lege häm cir bötenlegenä bulğan tulı yaqlawların häm Somalineñ cir bötenlegenä zarar kitergän yäki möstäqil'legen bozğan barlıq ber yaqlı omtılışlarnı kisken räweştä kire qağuları assızıqlandı.
