Ukrainanıñ törle töbäklärenä Rusiyäneñ soñğı hawa höcümnäre näticäsendä, kim digändä, sigez tınıç keşe hälaq bulğan, 23 keşe yaralanğan, dip xäbär itelä.
Ukraina ğadättän tış xällär xezmäteneñ yazmaça belderüendä Rusiyä armiyäse tarafınnan tönlä häm irtänge säğatlärdä ütkärelegän hawa höcümnäre turında çentekläp yazılğan. Belderüdä Kiyev-Odessa trassasına höcüm näticäsendä dronnıñ ike maşinağa tiyüe, anda ike keşeneñ ülüe häm dürt keşeneñ yaralanuı xäbär itelä.
Belderüdä, şulay uq, Kiyev, Xmelnitskiy häm Xarkov ölkälärenä tönlä höcüm yasaluı, näticädä, biş keşeneñ ülüe häm 13 keşeneñ yaralanuı bilgeläp ütelä.
Kiyev mêry Vitaliy Kliçko da sotsial mediada Rusiyä armiyäseneñ şähärgä höcüm itüe turında citkerde. Anıñ xäbär itüençä, yağulıq stantsiyäsenä höcüm yasalğan, başlañğıç mäğlümatlarda ber keşeneñ ülüe häm altı keşeneñ yaralanuı kürsätelgän.
Ukraina hawa köçläre üzeneñ sotsial media akkauntında Rusiyä armiyäse tarafınnan ilgä tönlä höcümnärdä qullanılğan 165 törle dronnıñ 115e yuq itelüen belderde.
