1894 yılda Massaçusets ştatındağı cämäğat kitapxanäsennän alınğan jurnal 132 yıldan soñ kire qaytarıldı.

Massaçusets ştatındağı Konkord cämäğat kitapxanäse üzeneñ sotsial' media akkauntında 1894 yılnıñ sentyabrendä kitapxanädän alınğan aylıq "The Century Illustrated" jurnalınıñ ber nösxäseneñ kire qaytarıluı turında belderde.

Belderüdä bu xäl kitapxanäneñ soñarğan öçen tüläwlärne tuqtatqannan soñ buluı bilgeläp ütelä, ğadäti şartlarda jurnal 48 220 köngä soñğa qalıp kire qaytarılğan öçen 12 055 dollar külämendä ştraf salınır ide.

Jurnalnı kire qaytarğan Djon isemle keşe anı küp yıllar öyendä saqlawın, läkin niçek üzenä kilep êläkkänen belmäwen äytte.

Djon kitapxanäneñ soñarğan öçen tüläw alunı tuqtatqanın belgäç, jurnalnı kire qaytarırğa buluın äytte.

Konkord kitapxanäse bolay dip belderde: "Älbättä, bu praktika tuqtatılğaç, bez küptänge kitaplarnıñ kire qaytarıluın köttek, läkin, älbättä, XIX ğasır axırınnan uq kötmägän idek".

1881 yıldan 1930 yılğa qadär Amerika Quşma Ştatlarında näşer itelgän "The Century Illustrated" jurnalında ädäbiyät, tarix, törle waqıyğalar turında yazmalar häm yuğarı sıyfatlı illüstratsiyälär bastırılğan.