Hindstannıñ küp töbäklärendä küzätelüçe êsselek arqasında berniçä ştat yärdäm çaraları turında citkerde.

Hindstan meteorologiya departamentı çarşämbe könne yasağan belderüendä, Gimalay töbäge, Bixarnıñ tönyak-könçığışı häm Hindstannıñ tönyak-könçığışınnan qala, ilneñ küp öleşendä maksimal’ köndezge temperatura 40-46°C arasında buluın xäbär itte.

Meteorologiya departamentı düşämbe könne terkälgän iñ yuğarı temperatura - Uttar-Pradeş ştatındağı Bandada 47,6°C buluın belderde.

Hindstannıñ Orissa ştatında däwam itüçe xalıq sanın aluda qatnaşqan ike uqıtuçı êsse suğudan ülde.

Hawa torışı belgeçläre äytüençä, bıyıl Hindstanda êsselek dulqınnarı irtä başlandı. Hindstannıñ “Skymet” hawa torışı xezmätläre citäkçese urınbasarı Maheş Palawat “Anadolu agentlığı”na: "Monıñ berniçä säbäbe bar; şularnıñ berse - qorı hawa barlıqqa kilü", - dide.

Hindstannıñ berniçä ştatı köndälek tormışqa täêsir itüçe köçle êsselekkä qarşı köräş çaraları turında iğlan itte. Moña êşçelär öçen köndezge säğat 1dän 4kä qadär mäcbüri yal, alarnı su häm külägä belän täêmin itü, mäktäplärdä balalarnı salqın su belän täêmin itügä iğtibar birü, transport tuqtalışlarında su êçü mömkinlege buldıru da kerä. Qayber ştatlar mäktäplärdä cäyge yallar başlanuın iğlan itte.

İlneñ küp öleşlärendä temperatura kütärelü belän tabıblar keşelärgä saqlıq çaraların kürergä kiñäş itte.