Törkiyä tışqı êşlär ministrı Xaqan Fidan Trampnıñ Änkarada 7-8 iyul’ könnärendä ütkäreläçäk NATO sammitında qatnaşırğa planlaştıruın äytte.
Düşämbe könne Singapur säfäre waqıtında “Bloomberg TV”ğa birgän interv’yuda Fidan Trampnıñ Änkaradağı NATO sammitında qatnaşıp-qatnaşmayaçağı turındağı sorawğa: “Belgänebezçä, äye, qatnaşırğa uylıy,” - dip cawap birde.
Fidan, Törkiyä ilbaşı Räcäp Tayyip Ärdoğannıñ uzğan ayda Tramp belän berniçä tapqır telefon aşa söyläşüen häm AQŞ ilbaşınıñ sammitta qatnaşaçağın äytüen citkerde.
Ministr Fidan, säyäsi söylämnärgä qaramastan, AQŞnıñ NATO berlegenä tuğrı buluın assızıqladı.
Fidan tübändägeçä citkerde: “AQŞ berlektäşlargä saqlanu çığımnarın arttıruları häm üz iminlekläre öçen tağın da küp cawaplılıq aluları mäs’äläsendä härwaqıt basım yasıy. Awrupalılar NATO qısalarında saqlanu byudjetların arttıru öçen xäzerdän adım yasıy başlağan. Liderlar cıyılğaç, ireşelgän alğa kitüne küzdän kiçeräçäkbez.”
Fidan şulay uq ike yaqnıñ da utnı tuqtatunı ozaytu öçen tırışuın belderep, Änkara citäkçelegeneñ AQŞ belän İran arasındağı söyläşülärne xuplawına basım yasadı.
Utnı tuqtatuğa qaramastan İzrailneñ Livannıñ kön’yağındağı “Xizbulla”nı maqsat itep alğan höcümnäreneñ söyläşülärne qaqşata alaçaq möhim risk tudıruı turında kisätkän tışqı êşlär ministrı: “Amerikalılarnıñ häm iranlılarnıñ êçkersez bulularına ışanam. Utnıñ tuqtawın häm Ormuz buğazınıñ açıluın telilär, läkin İzrailneñ niyäten belmim,” - dide.
