Nigeriyäneñ tönyaq-könçığışındağı Adamawa häm Borno ştatlarında terrorçı “Boko Xaram” oyışmasına qarşı hawa operatsiyäläre waqıtında 103 terrorçı täêsirsez xälgä kiterelde.

Nigeriya Qorallı Köçläreneñ terrorçı oyışmalarğa qarşı alıp barıla torğan «Hadin Kai» operatsiyäse komandirı wazıyfasın başqaruçı Möxämmäd Musa Goni armiyäneñ soñğı waqıtta terrorçılıqqa qarşı ütkärgän çaraların jurnalistlarğa añlattı.

Goni beldergänçä, 10–18 oktyabr könnärendä armiya Adamawa häm Borno ştatlarında “Boko Xaram” äğzalarına qarşı hawa operatsiyäläre ütkärgän.

Ul älege operatsiyälärdä 103 terrorçınıñ üterelüen, distälägän terrorçınıñ isä yaralanğan kileş qaçuın citkerde.

Nigeriyädä 2000 yıllarnıñ başınnan birle aktiv bulğan “Boko Xaram” oyışmasınıñ 2009 yıldan birle oyıştırğan küpläp üterü xarakterındağı terrorçı höcümnäre näticäsendä distälägän meñ keşe hälaq buldı.

2015 yıldan birle terrorçı oyışma ilneñ kürşe däwlätläre — Kamerun, Çad häm Niger cirlegendä dä höcümnär oyıştıra. Oyışmanıñ Çad küle basseynındağı höcümnärendä kim digändä 2 meñ keşe hälaq buldı.

İldä terrorçı höcümnär häm bäreleşlär säbäple yöz meñlägän keşe üz yortların taşlap kitärgä mäcbür buldı.