Yaqın Könçığış suğışınıñ külägäsendä meñlägän amerikalı häm filippinlı ğaskäre berençe tapqır Yaponiyäneñ möhim xärbi kontingentınıñ da qatnaşuında düşämbe könne yıllıq xärbi künegülärenä başladı.
Suğış uyınnarı ilneñ tönyağında Tayvan buğazına qarawçı töbäktä häm bäxäsle Könyaq Qıtay diñgez yar buyındağı vilayättä çın patronnar belän ütkäreläçäk xärbi künegülärdän toraçaq.
1 meñ 400 personal cibärgän Yaponiyä ğaskäre tönyaqtağı Paoay kiñlegendä nişandağı köymäne batıru öçen “Type 88” qanatlı raketa qullanaçaq.
Awstraliyä, Yaña Zelandiyä, Franśiyä häm Kanadadan da xärbilär qatnaşuçı 19 könlek “Balikatan” yäki “İñgä-iñ” xärbi uyınnarında 17 meñnän kübräk ğaskäri, hawa personalı häm diñgezçe qatnaşa.
AQŞ künegülär süzçese podpolkovnik Robert Bunn xärbi künegülärneñ “irekle häm açıq Hind-Tın okeanına bulğan tuğrılıqların” kürsätüen belderep, AQŞ xärbi personal sanınıñ ile alıp barğan Yaqın Könçığış suğışınnan täêsirlänmäyäçägen iskärtep uzdı.
Regional kiyerenkelek noqtaları
“Balikatan” xärbi künegüläre İran, Amerika Quşma Ştatları häm İzrail arasındağı ike atnalıq utnı tuqtatunıñ tämamlanuına barı tik berniçä kön qala ütkärelä.
Bäreleşlär ênergiyä bäyälärendä global krizis kiterep çığarğan bulsa, importqa bäyle Filippinğa citdi yoğıntı yasadı.
Xärbi künegülär Pekinnıñ Tayvan tiräsendä xärbi basımnı kübäytkän çorda ütkärelä.
Filippin İlbaşı Ferdinand Markos uzğan noyabr ayında: “Tayvan arqasında çığaçaq suğış Filippinne dä telämiçä bulsa da bäreleşlärneñ êçenä êtäräçäk”, - dip äytkän ide.
Xärbi künegülär waqıtında keşesez hawa aparatlarına qarşı texnologiyälär belän bergä integralläşterelgän hawa häm raketa saqlanu sistemaları da sınap qaralaçaq.
Yaponiyä ber tank desant qorabı, ber êsmineś häm boralaq êsmineśı urnaştırğan bulsa, AQŞ isä Filippin häm Kanada fregatlarına quşılu öçen patryul köymäse häm zur desant qorabın qullanaçaq.
