AQŞ delegatsiyäse bu könnärdä Kuba xökümäte wäkilläre belän diplomatik êlemtälärne yañarttı. Bu oçraşular AQŞ ilbaşı Donald Trampnıñ tıqşınu belän yanawlarına qaramastan häm Kuba liderınıñ, mondıy xäl kilep çıqsa, suğışırğa äzer buluın belderüennän soñ buldı.
AQŞ däwlät departamentındağı çığanaq uzğan atnadagı säfär waqıtında Kubanıñ êlekkege liderı Raul Kastronıñ onığı Raul Gil'yermo Rodriges Kastro belän oçraşu buluın rasladı. Comğa könne mäsäläneñ çetereklege arqasında anonimlıq şartı belän söylägän çığanaq bu mäğlümatnı birde.
AQŞ yağı oçraşuda kem qatnaşuın açıqlamadı. Raul Gil'yermo Rodriges Kastro räsmi wazıyfa bilämäsä dä, Kuba xökümätendä yoğıntılı rol' uynıy dip sanala.
AQŞ’nıñ ikençe ber räsmi wäkile däwlät särqatibe Marko Rubionıñ Gavanağa kilgän delegatsiyä sostavında bulmawın belderde. AQŞ wäqalätleläre êlegräk Kuba immigrantınıñ ulı häm Kubağa qarşı säyäsätne küptän yaqlawçı Rubionıñ fevral' ayında Sent-Kits häm Nevista yäş' Kastro belän oçraşuın beldergän ide.
“Axios” tarafınnan aldan xäbär itelgän gadättän tış diplomatik başlanğıç waqıtında AQŞ delegatsiyäse Kubanı iqtisadi häm administrativ ölkälärdä zur üzgäreşlär yasarga çaqırdı. Ber türä süzlärençä, AQŞ utraw-däwlätneñ töbäk qurqınıçsızlığına yanaw tudıruına yul quymayaçağın assızıqladı.
Bu säfär 2016nçı yıldan birle AQŞ xökümäte oçqıçınıñ, Guantanamo qultığındağı AQŞ xärbi-diñgez bazasınnan tış, Kubağa kilüe belän bäyle berençe waqıyğa buldı.
AQŞnıñ ênergetika êmbargosı häm Tramp administratsiyäseneñ Kuba xökümäten näticäsez häm repressiv dip atawı arqasında Kubadağı krizislar tağın da tiränäyde. AQŞ säyäsi repressiyälärne tuqtatunı, säyäsi totqınnarnı azat itüne häm sanktsiyälärne yomşartu öçen utraw iqtisadın liberalläşterüne taläp itä.
Wäqalätlelär süzlärençä, yaqlar uzğan atnada AQŞnıñ Kubağa Starlink iyärçene aşa tüläwsez häm ışanıçlı internet birü täqdimen dä tikşerde.
Tramp: Kuba öçen yaña tañ
AQŞ ilbaşı Donald Tramp İrandagı suğış tämamlanğannan soñ idaräseneñ Kubağa iğtibar itä alaçağın belderde.
Tramp utrawnı "uñışsız il" dip atası häm anıñ "ozaq waqıt däwamında naçar idarä itelüen" belderde.
Cawap itep, Kuba däwlät başlığı Migel Dias-Kanel AQŞnıñ utrawğa xärbi höcüm başlaw yaki anı bärep töşerü öçen bernindi dä nigizle säbäbe yuqlığın, läkin kiräk bulsa, il üzen yaqlarğa äzer buluın belderde.
Comğa könne çıgış yasaganda, Tramp Kuba öçen "yaña tañ" atuın belderde, Amerika "köçe" utrawğa 70 yıldan soñ üzgäreşlär kiteräçäk dide.
