Törkiyä ilbaşı Räcäp Täyyip Ärdoğan Änkaranıñ däwam itüçe bäreleşlär waqıtında töbäktäge mäkerle uyınnarğa qarşı toru öçen çaralar kürüen äytte häm milli berdämlekkä, şulay uq saqlanu sänäğatendäge daimi alğarışqa basım yasadı.

İlbaşı Ärdoğan, Törkiyäneñ saqlanu sänäğaten nığıtunı däwam itüen, şul uq waqıtta däwam itüçe bäreleşlär aşa töbäkne yañadan üzgärtep qoru, yañadan formalaştıru omtılışlarına qarşı êşläwen belderde.

Düşämbe könne başqala Änkarada uzğan kabinet cıyılışınnan soñ çığış yasağan Ärdoğan Ğazzä, Livan, Sudan häm Yämändäge çiklärneñ qan häm küz yäşe belän sızılırğa tırışıluın, ä Törkiyäneñ isä bu uyınnarnı bozırğa tırışuın äytte.

İlbaşı bolay dide:

“Bez töbägebezdä çiklärneñ qan häm küz yäşe belän yañadan sızılırğa tırışıluın küräbez. Ğazzädän Livanğa, Yämännän Sudanğa qadär, qaya ğına qaramıyq, şul uq uyınnıñ küreneşläre belän oçraşabız. Törkiyä bularaq, ber yaqtan bu uyınnarnı bozarğa tırışqanda, ikençe yaqtan soñğı 23 yıllıq qazanışlarıbıznı nığıtu öçen köräşäbez”.

Ärdoğan Törkiyäneñ saqlanu sänäğatendä dä “dastan yazuın”, regional’ häm global’ masştabta zur üzgäreşlär çorı kiçerelgändä ozın möddätle maqsatlarına iğ’tibar yünätüen belderde.

Ärdoğan: “Xakimiyat häm ittifaq bularaq, bez tarixi üzgäreşlär kiçergän çorda tarixi cawaplılıqnı üz östebezgä aluıbıznı  yaxşı añlıybız. Bezneñ açuğa, tartqalaşuğa häm bäxäslärgä waqıtıbız yuq”,— dip äytte.