“Wall Street Journal” xäbär itüençä, AQŞ ilbaşı Donald Tramp üzeneñ yärdämçelärenä İranğa qarşı kiñäytelgän blokadağa äzerlänergä quştı.

AQŞ räsmilärenä sıltama belän yazılğan xäbärdä, Trampnıñ soñğı oçraşularda sudnolar xäräkäten tuqtatıp, İran iqtisadın häm neft êksportın çikläwne däwam itüne östen kürüe äytelä.

Xäbärgä qaraganda, räsmilär Trampnıñ blokadanı saqlap qaludan başqa variantlarnı - bombaga totunı däwam itü yaki konflikttan çıgunı qurqınıçraq dip sanawın citkerä.

İsegezgä töşeräbez, AQŞ häm İzrail 28 fevraldä İranğa qarşı urtaq operatsiya başladı. Tähran AQŞnıñ töbäktäge, nigezdä, Farsı qultığı illärendäge obyektlarına qarşı höcümnär belän cawap birde.

8 apreldä Paqıstan aradaşçılığı belän utnı tuqtatu kileşüe tözelde. 11-12 apreldä İslamabadta söyläşülär ütkärelsä dä, ul kileşügä kitermäde.

Tramp soñraq Paqıstan üteneçe buyınça, Tährannan täqdim kilgänçegä qadär, utnı tuqtatu kileşüe ozaytıldı dip belderde.

Düşämbe könne yasağan belderüendä Tramp Tährannıñ soñğı täqdimen qabul itüeneñ bik mömkin tügellegen äytte, anda "Ormuz buğazın açu häm atom-töş programması turında sorawlarnı soñraq bulaçaq söyläşülär öçen qaldıru küzdä totıla".