Ägäy êksportçıları assośiaśiyasennän yasalğan açıqlawğa qarağanda, Törkiyä limon êksportında alda baruçı illär arasında dönyada 5nçe urında tora.
Ägäyneñ ciläk-cimeş häm yäşelçä êksportçıları assośiaśiyase başlığı Cängiz Balıq êksportnıñ küläm yağınnan kimüen, ä kerem yağınnan artuın assızıqladı. Moña êksport bäyäläreneñ kütärelüe säbäp bulğan.
Başlıq Törkiyä 2025 yılda tormışqa aşırğan 3 milliard 703 million dollarlık ciläk-cimeş häm yäşelçä êksportınıñ 11 %ınıñ limonnan täêmin itelüen citkerep, citeşterelgän ciläk-cimeş häm yäşelçäneñ urtaça 7 %ınıñ êksportka cibärelüen, limonda bu kürsätkeçneñ 33 %ka citüen äytte.
Maqsat — 500 million dollardan artıp kitü
Cängiz Balıq ğinwar - aprel ayları turında bolay dide: "Limon êksportıbız 18% lık artış belän 165 million dollardan 195 million dollarğa citte. 2026 yıl axırında limon êksportında 500 million dollardan artıp kitüne maqsat itep quyabız".
Törkiyäneñ 2002 yılda 230 meñ tonna bulğan limon êksportınıñ 2024 yılda 577 meñ tonnağa citüen açıqlağan başlıq 2026 yılğı uñış turında söyläşergä irtäräk buluın läkin 2025 yılğıdan da yuğarıraq uñış kötülären citkerde.
Cängiz Balıq ğinwar-aprel çorında iñ küp taläp kürsätkän illär arasında Ğiraqnıñ 64 million yarım dollar belän berençe urında, Rusiyäneñ 50 million dollar belän ikençe, ä Rumıniyäneñ 14 million yarım dollarlık êksport belän öçençe urında toruın belderde.
