Fransiyäneñ Kan şähäre timer yul vokzalı qarşısındagı uramda ber yörtüçe maşinasın xalıq östenä yünältä. Cirle waqıt belän kiçke säğat 10 tulıp 15 minut tiräsendä bulğan waqıyğada maşina yörtüçeneñ cäyäwlelärne maxsus bärderüe belderelä. Näticädä 1 keşe hälaq bulğan, 10 keşe yaralanğan, alarnıñ 7seneñ xäle awır. Şähär politsiyäse xezmätkärläre barlıq qorbannarnıñ da 17 yaştän 40 yaşkä qadärge ir-atlar buluın belderde.
Xäbärlärgä qarağanda, waqıyğa aldınnan şul tirädä ğawğa bulğan.
Rusiyädä tuğan 26 yäşlek şöbhäle küzläw organnarına bilgele tügel häm ul yul xäräkäte qağıydälären bozğan öçen genä politsiyädä terkälgän bulğan.
Waqıyğa urınınnan qaçqan şöbhäle yaqınça 20 kilometr yıraqlıqtağı Uistremda êläkterelä.
Prokuratura bu waqıyğa nisbätennän üterü häm awır höcüm itü ğäyepläwläre belän tikşerü başladı.
Xakimiyat organnarı tikşerüneñ äle başlanğıç êtapta buluın häm, bulğan mäğlümatlarğa nigezlänep, waqıyğanıñ terrorçılıq belän bäyläneşe yuqlığın belderde.
