Angliyä xökümäte yaw astındağı Fälästin cirlärendä urnaşqan qanunsız toraq punktları belän säwdäne räsmi räweştä tıyarğa äzerlängän çaqta İzrail ministrları Bezalel Smotriç häm İtamar Ben-Gvir İzrailneñ Angliyägä sankśiyä kertüen, bu ilneñ ilçesen ildän çığarıp cibärüen häm Argentinanıñ Falkland utrawlarına däğwa itkän suverenlığın tanunı taläp itte.
İzrail Finans ministrı Bezalel Smotriç “X" platforması aşa urtaqlaşqan yazmasında Angliyäneñ İzrail ilçesen xäzer ük ildän çığarıp cibärergä çaqırıp bolay dip yazdı: "İngliz ilçesen bu tönlä deportaśiyälägez! Bez antisemit xökümätneñ ayaqlar astına salğan palas bulmayaçaqbız. İzrail cirlärendäge ingliz mandatı tämamlandı".
İzrail Milli iminlek ministrı İtamar Ben-Gvir dä, “X" platformasınnan ispança yazmasın urtaqlaşıp, Başministr Binyamin Netanyaxunı Argentinanıñ Falkland utrawlarına qağılışlı däğwasın tanıp, üç alırğa çaqırdı: "İzrail däwläteneñ Malvinas utrawların inglizlärneñ Argentina xalqınıñ qulınnan köçläp aluın, Argentinanıñ yawlap alınğan cirläre buluın açıqtan-açıq qabul itü waqıtı citte".
Milibandnıñ säwdäne tıyuı häm diplomatik çağılışları
Bu kiyerenkelek Angliyä Tışqı êşlär ministrlığı Ed Milibandnıñ sişämbe könne xalıq ışanıçlılarına möräcäğät itep yasayaçaq häm Angliyäneñ İzrail belän mönäsäbätlärendä "kiñqırlı üzgärtep qoru” dip atağan üzgäreşne iğlan itärgä äzerlängän çorda bula.
Telgä alınğan çaralar BMO Xalıqara mäxkämäseneñ 2024nçe yılğı konsultativ qararına yaraşlı, Yordannıñ könbatış üzänlegendäge qanunsız bistälärdän kilep çıqqan tovarlar häm qayber xezmätlär belän säwdä itüne, şul isäptän finanslaw häm reklamanı tıyunı küzdä tota.
