Peruda turistlar utırğan oçqıç Naska şähäre yanındağı cirlekkä kilep töşte. Räsmi zatlar faciğada 13 keşeneñ ğomere özelüen belderde.

Poliśiya mayorı Xorxe Andrade şimbä könne ilneñ könyağında barlıqqa kilgän hälakät urınında jurnalistlarğa yasagan belderüendä: “Bezdäge mäğlümatlar buyınça, 11 passajir häm ike êkipaj äğzası hälaq bulğan”, - dide.

Naska muniśipalitetı “Facebook” çeltärendä belderü yasap, oçqıçnıñ turistlarnı yözlägän yıl êlek Perunıñ cirle xalıqları tarafınnan Naska tiräsendäge çülgä yasalğan kiñ geogliflardan toruçı Naska sızıqları êkskursiyasenä alıp çığuın bilgeläp ütte.

Xayvan figuralarınnan torğan sızıqlar barı tik oçqıçlar yäki küzätü manaralarınnan ğına tulısınşa kürenä.

Naska muniśipalitetı oçqıçnıñ yaqındağı İka şähärennän kütärelüen həm Perunıñ «Aerodiana» şirkätenä bäyle buluın açıqladı.

Aviakompaniyanıñ internet-saytında “Cessna Grand Caravan” törendäge oçqıçlar belän soñğı 14 yıl dävamında Naska sızıqları östendä turistik oçışlar oyıştırıluı urın ala.

Peru räsmi zatları hälakät belän bäyle tikşerü başlanğanın xäbär itte. «Aerodiana» isä älegä bernindi belderü yasamadı.