Çärşämbe könne bastırılğan “The Washington Post” xäbärenä qarağanda AQŞ küzläw räsmi zatları İrannıñ Donald Trampnı üterü planı turındağı xäbärneñ ışanıçlılığına şiklänä. Bu xäbärne İzrail citkerde häm ul Tramp uzğan ayda Törkiyädän kitkändä ğadättän tış qurqınıçsızlıq operaśiyasenä kitergän ide.
Xäbärdä küzätü belän tanış bulğan êlekkege AQŞ räsmilärenä sıltama yasala. ŚRU analitikları İzrail birgän mäğlümat ışandırmıy dip äytä. Alar üz şiklären Tramp citäkçelegenä citkergän.
“The Post” xäbär itüençä ber AQŞ räsmi zatı xäbärne “AQŞ çığanaqlarınnan tügel, ä İzrail çığanaqlarınnan alınğan häm ışanıçı tübän dip sanala” dip sürätlägän.
Küzätü belän bäyle bu borçılular Tramp 8 iyuldä NATO sammitınnan soñ Änkaradan kitkändä kürelgän kiñ qurqınıçsızlıq çaralarına yaña ülçäm östi.
“The Post” êlegräk ilbaşınıñ Qatar büläge bulğan yaña “Boeing 747-8” oçqıçında oçış öçen citärlek qurqınıçsızlıq çaraları barmı digän borçular tuğannan soñ iske ilbaşı oçqıçınnan öçençe oçqıçqa yäşeren räweştä küçerelüe turında xäbär itkän.
Xäbärlärgä qarağanda Tramp aêroportta ilbaşı oçqıçınnan “C-32A” xärbi oçqıçına yök maşinası aşa küçerelgän. Tramp häm anıñ yärdämçelärennän torğan keçkenä törkem annarı Angliyadäge Mildenxoll hawa köçläre bazasına oçtı. Oçqıçnı “F-16” xärbi oçqıçları ozatıp bardı.
Ğadättan tış çaralar
Aq Yort küzätü bäyälämäse turındağı sorawlarğa turıdan-turı cawap birmäde. Ber AQŞ räsmiye ilbaşınıñ küpsanlı qurqınıçlar belän oçraşuın häm anı yaqlaw öçen barlıq kiräkle çaralar kürelüen äytte.
ŚRU añlatma birüdän baş tarttı, ä Vaşingtondağı İzrail ilçelege gazet xäbärenä açıqlaw kitermäde.
Ber räsmi zat “The Post” gazetına: “Yäşeren xezmät bu däwlät başlığı belän bäyşe bularaq öç tapqır köç-xäl belän qotılıp qaldı, şunıñ öçen alar bernindi riskka barmıylar,” – dide.
Tramp sişämbe könne başqa oçqıç qullanu qararın Yäşeren xezmätneñ qabul itüen äytte.
“The Post” xäbär itüençä Tramp: “Moña çınnan da tulısınça Yäşeren xezmät qarar birä. Min alar äytkänne êşlim. Minnän başqa oçqıçqa küçep utıruımnı soradılar. Qurqınıçsızlıq yağınnan şundıy uq oçqıç,” – dide.
İzrailneñ niyätläre tikşerelä
Bu şiklär şulay uq İzrailneñ bu küzätü mäğlümatların Vaşington citäkçelege belän ni öçen urtaqlaşuı häm bu mäğlümatnıñ barı tik kisätü genäme yäki AQŞ säyäsätenä yoğıntı yasawğa yünältelgänme digän sorawlar tudırdı.
“The Post” gazetı beldergänçä AQŞnıñ qayber êlekkege häm xäzerge küzätü xezmätkärläre İzrail xisabı öleşçä Trampnıñ qarar qabul itü barışına häm Vaşington citäkçelegeneñ töbäkkä qaraşına yoğıntı yasaw öçen êşlängän bulırğa mömkin dip sanıy.
Xäbärdä şulay uq AQŞ däwlät särqätibe Marko Rubioğa İzrailneñ küzätü xisabı häm Yäşeren xezmät tarafınnan planlaştırılğan operaśiya turında mäğlümat birelgän dip äytelä.
“The Post” gazetı sıltama yasağan êlekkege AQŞ räsmi zatı süzlärençä Rubio barıber iske modeldäge ilbaşı oçqıçına utırğan.
