Amerika Quşma Ştatları ilbaşı Donald Tramp tizdän Ormuz buğazın AQŞ cire dip iğan itäçägen äytte.

İran xökümäte isä cawap bularaq AQŞ yanawlarınnan qurıqmawın belderde.

Tramp, comğa könne N’yu-Yorknıñ Garden Siti qalasındağı yaña Nassau Kaunti poliśiya akademiyäsendä yasağan belderüendä: “Xäzergä awır ciñelügä duçar bulğan İrannı tulısınça ciñgännän soñ bik tizdän Ormuz buğazın AQŞ cire dip iğlan itäçäkmen,” - dide.

Tramp şulay uq bu strategik su yulına qarata qullanılğan AQŞ qamalışınıñ däwam itüen belderep: “Bez röxsät birmiçä bernindi köymä ütä almayacaq,” - dip östäde.

İran citäkçelegeneñ suğış arqasında nıq qaqşağanın beldergän Tramp: “Xäzerge waqıtta minem mäs’äläläremneñ berse – menä närsä: söyläşülär alıp barırlıq keşe qalmadı. Bu - problema. Bu berkem dä ilbaşı bulırğa telämagän berdänber il,” - dide.

AQŞ ilbaşı suğışqa bäyle bularaq artqan benzin bäyäläre turında tübändägelärne äytte: “Benzin öçen kübräk aqça tülisez ikän, onıtmağız, monı bik yaman il, yägni dönyadağı ber nomerlı terror yaqlawçısı bulğan däwlät atom-töş qoralğa iyä bulmasın dip yasıysız.”

Läkin İran xärbi wäkilläre AQŞnıñ su yulındağı kontrole belän bäyle däğwalarnı kire qaqtı; İrannıñ Üzäk xärbi citäkçelege pänceşämbe könne bu däğwalarnı “nigezsez yalğannar” dip atadı.

İran Trampnıñ belderüenä cawap birde

Trampnıñ comğa könge belderülärenä cawap birgän İrannıñ tışqı êşlär ministrı urınbasarı Kazim Garibabadi Tähran citäkçelegeneñ Vaşington citäkçelege yanawlarınnan yäki köç kürsätüennän qurıqmayaçağın äytte.

Garibabadi “X” platformasındağı yazmasında strategik ähämiyätkä iyä bulğan Ormuz buğazınıñ barı tik İran xakimiyäte astında ğına açıla yäki yabıla alaçağın belderde.