Ärmänstan xökümäte räise Nikol Paşinyan Azärbaycanğa “Qarabax mäs'äläsen” beterü öçen urtaq yul kartası qabul itü täqdimen yasağan.

Paşinyan Germaniyadağı matbuğat oçraşuında yasağan belderüendä häm pänceşämbe könne däwlät mäğlümat agentlığı “Armenpress”qa bolay dip äytte: "Min (Azärbaycanğa) turıdan-turı täqdim yasıym: utırıp bu mäs'äläne niçek beteräçägebezne kürsätkän yul kartası êşlik".

Paşinyannıñ süzläre bu atnada sişämbe köne çıqqan Azärbaycan tışqı êşlär ministrlığı belderüenä reaksiyä bulıp kilde. Ul belderü bu ay başında Ärmänstan belän Awrupa Berlege arasında strategik kön tärtibe qabul itelü turında ide. Baqı älege dokumenttağı “Azärbaycan xärbi çaraları näticäsendä küçerelgän Qarabax ärmännäre” digän bilgelämäne tänqıytläde.

Baqı alarnı 'qaçqınnar' dip klassifikatsiyäläwne “Azärbaycanga qarata tiskäre qaraşnıñ açıq misalı” dip atadı.

“Qarabax xäräkäteneñ qabat başlanuın buldırmasqa tiyeşbez”

Paşinyan ärmännärneñ Qarabaxqa kire qaytuın “xätär tema” dip taswirlıy. Ul problemanı xäl itüneñ “ozın möddätle bäreleş ixtimalın beterü” bulaçağın alğa sörde.

"Min, xätta, Qarabaxtan bulğan keşelärebezgä dä alarnıñ qaytuı mömkin tügellegen äyttem," - dide Paşinyan.

"Ägär bez kire qaytu temasın däwam itäbez ikän, bu Qarabax xäräkäten kabat başlawğa kiterer. Läkin min inde äytkän idem, bez Qarabax xäräkäten kabat başlatmasqa tiyeşbez. Qarabax xäräkäte tämamlandı häm anı yañadan tergezü tırışuları faydasız," dip östäde ul.

Azärbaycan bu täqdimgä äle räsmi räweştä cawap birmäde.