İstanbul gubernatorlığı belän "Qaldıqsız dönya" waqıfı xezmättäşlegendä oyıştırılğan İstanbuldağı “Qaldıqsız dönya” atnalığı çaraları tämamlanğannan soñ, İstanbul gubernatorı Davut Gül häm "Qaldıqsız dönya" waqıfı başlığı Samäd Ağırbaş başqarılğan êşlärneñ näticälären bäyäläw maqsatı belän matbuğat oçraşuı oyıştırdı.

Atatörek aêroportındağı festival’ mäydanında belderü yasağan gubernator Gül İstanbuldağı “Qaldıqsız dönya” atnalığı qısalarında oyıştırılğan çaralarnıñ şähärneñ här poçmağında zur qızıqsınu uyatuın citkerde.

Davut Gül Törkiyä ilbaşı Räcäp Tayyip Ärdoğannıñ xäläl cefete Äminä Ärdoğan ximayası astında alıp barılğan "Qaldıqsız dönya" xäräkäteneñ Törkiyädä häm bar dönyada zur yañğırış tabuın, Törkiyäneñ yomşaq köçenä öleş kertüçe global’ markağa äwerelüen äytte.

Gubernator Gül, “Qaldıqsız dönya” atnalığı qısalarında uzğan Xalıqara “Qaldıqsız dönya” forumında 183 ilneñ wäkile qatnaşuın, monıñ İstanbul häm Törkiyäneñ xalıqara däräcäsenä zur öleş kertüen citkerde.

"Qaldıqsız dönya" waqıfı başlığı Samäd Ağırbaş isä “Qaldıqsız dönya” atnalığınıñ kötelgännän dä yuğarıraq qızıqsınu kürüen belderep, çaralarda ber milyonnan artıq keşeneñ qatnaşuın äytte.

Xalıqara “Qaldıqsız dönya” forumınıñ da dönya külämendä möhim oyışmağa äwerelüen assızıqlağan Ağırbaş: "“Qaldıqsız dönya” forumında 183 ildän 5 meñnän artıq keşe qatnaştı häm ul dönyanıñ iñ zur êkologiya häm klimat üzgäreşe oçraşuı buldı", — dide.

Forum qısalarında global’ êkologiya mäs’äläläre, klimat üzgäreşe häm azıq-tölek qurqınıçsızlığı kebek başçalarnıñ qaraluın beldergän Ağırbaş, oçraşu azağında 183 ilneñ yärdäme belän İstanbul deklaraśiyäseneñ äzerlänüen citkerde.