Marokkonıñ Fes şähäre prokurorı pänceşämbe könne yasağan belderüendä tönlä şähärdäge dürt katlı binanıñ işelüe näticäsendä, berençe mäğlümätlärgä kürä, tuğız keşeneñ hälaq buluın häm küp sanda keşeneñ yaralanuın äytte.

Küp keşe yäşägän mäxällädäge kürşe binalarda toruçılardan saqlanu çarası bularaq, öylären büşatuları soraldı. Êzläw-qotqaru törkemnäreneñ êşläre däwam itä.

“Al Oula” däwläte televideniese xäbärenä kürä, 1980nçe yıllarda salınğan binanıñ cimereklärennän töşkä qadär altı keşe qotqarılğan.

Sigezençe ğasırğa qadär barıp totaşuçı tarixı belän däwlätneñ öçençe zur şähäre bulğan Fes, soñğı aylarda oxşaş waqıygalarğa säxnä buldı. Dekabr' ayında ike binanıñ işelüe näticäsendä 22 keşe hälaq bulğan ide.

2010nçı yılda isä, ilneñ tönyağında urnaşqan tarixi Meknes şähärendä manaranıñ cimerelüe näticäsendä 41 keşe yaqtı dönyadan kitte.

Tözeleş häm toraq ministrı Adib Ben Ibrahim uzğan yılda, il külämendä yaqınça 38 meñ 800 binanıñ işelü qurqınıçı astında buluın äytte.