Törkiyä tışqı êşlär ministrı Xaqan Fidan üzeneñ sotsial' media akkauntında Azärbaycan başqalası Baqığa säfäre turında mäğlümat belän urtaqlaştı.

Säfärneñ Baqınıñ azat itelüeneñ 108 yıllığına turı kilüen äytep, Fidan bolay dide: "Bez tuğanıbız häm berlektäşebez Azärbaycanğa möhim säfär qıldıq, bez anıñ belän global' problemalar häm töbäk waqıyğaları aldında härwaqıt xezmättäşlektä häm teläktäşlektä torabız".

Fidan barlıq Azärbaycan räsmilärenä, bigräk tä, tışqı êşlär ministrı Cäyxun Bäyrämovqa ixlas qunaqçıllıqları öçen räxmät belderde.

Ul Azärbaycan ilbaşı İlham Äliyev tarafınnan qabul itelüen häm Tışqı êşlär ministrı Cäyxun Bäyrämov belän komplekslı oçraşular ütkärelüen, anda töbäktäge krizislarnı bäyäläwlären häm Kavkazda ozaq waqıtlı tınıçlıq, totrıqlılıq häm çäçäk atu, şulay uq, törki dönyanıñ urtaq kiläçäğe turında fiker alışuların belderde.

Fidan, şulay uq, iqtısadi häm säwdä mönäsäbätlären alğa taba üsterü adımnarı, ênergetika häm transport tarmaqlarında urtaq proyektlar, qurqınıçsızlıq ölkäsendä xezmättäşlek turında fiker alışuların assızıqladı.

Ministr Fidan bolay dip belderde: "Küpsanlı problemalar mäydanı bulğan töbägebezdä Törkiyä häm Azärbaycan ike totrıqlılıq utrawı bulıp tora. Bez tuğandaş Azärbaycan belän xezmättäşlegebezne tiränäytüne däwam itäçäqbez häm urtaq maqsatlarıbızğa taba iñgä-iñ atlayacaqbız".