Awrupa ğaläm agentlığı (ESA) klimat krizısın häm anıñ üsemleklär belän okeannarğa yoğıntısın yaxşıraq küzätü öçen ike iyärçenne Cir orbitasına uñışlı urnaştırdı.

Awrupanıñ “Flex” häm “Sentinel-3C” iyärçennären yörtüçe “Vega-C” raketası sişämbe könne Franśuz Gvineyasındağı Kuru ğaläm üzägennän oçırıldı.

İyärçennär starttan soñ yaqınça ike säğat uzğaç Qoyaşqa sinxron orbitağa urnaştırıldı.

"Fluorescence Explorer" digän süzdän qısqartılğan “Flex” cılılıq dulqınnarı häm başqa äylänä-tirä moxit stress faktorlarınıñ üsemleklärgä niçek täêsir itüe turında mäğlümat cıyaçaq.

İyärçen fotosintez waqıtında üsemleklär çığarğan zäğıyf qızıl yaqtılıq - fluoresenśiyäne küzätep, üsemlek stressı häm älege yaqtılıq arasındağı bäyläneşne bilgeläyäçäk häm ülçäyäçäk, di “Flex” programması menedjerı T'yerri Xuyban.

Awrupa Berlegeneñ Kopernik Cirne küzätü programması qısalarındağı “Sentinel-3C” diñgez moxiten, şul isäptän, diñgez ösleğe temperaturasın, dulqın biyeklegen häm okean ağımnarın küzätäçäk.

Şulay uq, iyärçen cirne qullanu häm üsemleklär turında mäğlümatlar cıyaçaq, bu awıl xucalığı citeşterüçänlegen arttırırğa häm azıq-tölek krizısı qurqınıçın kimetergä yärdäm itäçäk.

Awrupa ğaläm agentlığınıñ Cirne küzätü programmaları citäkçese Simonetta Çeli mondıy missiyälärneñ klimat krizısın añlaw häm aña cawap birü öçen "möhim" buluın belderde.