AQŞ ilbaşı urınbasarı Djey Di Vêns İran belän söyläşülärdä bernindi kileşügä dä ireşelmäwen häm Vaşingtonnıñ Paqıstandagı marafon söyläşülärennän soñ üzeneñ "axırğı häm iñ yaxşı täqdimen" kertüen iğlan itte.

Paqıstan başkalası İslamabadta 21 säğatkä yaqın däwam itkän söyläşülärdän soñ çıgış yasagan Vêns AQŞnıñ İranğa täqdimne qarap çığarğa waqıt birüen äytte.

"Bez monnan bik ğadi täqdim belän kitäbez: bu bezneñ axırğı häm iñ yaxşı täqdimebez bulğan kileşü ısulı. İranlılar anı qabul itärme, yuqmı - kürerbez", - dide ul.

Vêns İran delegatsiyäseneñ Vaşington şartların qabul itmäskä qarar qıluın häm söyläşülärneñ äle qanäğatlänerlek näticä birmäwen belderde.

İrannıñ atom-töş qoralı buldıru belän şögıllänmäw turındağı wäğdäsenä sıltama yasap, Vêns: "Bez monı äle kürmädek. Kiläçäktä kürerbez dip ömetlänäbez", - dide.

Vêns töp fiker qarşılıqları İrannıñ atom-töş programması bulıp qala birüen häm AQŞnıñ ozaq waqıtlı garantiyälär aluın assızıqladı.

İran "çiktän tış qatğıy" taläplärne kire qağa

İran söyläşülärneñ Vaşington "çiktän tış qatğıy" häm "qanunsız" taläplärdän baş tartqan oçraqta gına uñışlı bulaçağın äytte.

Tışqı êşlär ministrlığı wäkile İsmäğıyl Bekayi alğarış AQŞnıñ "citdilek häm yaxşı niyät" kürsätüenä häm İrannıñ "qanunlı xoquqların häm mänfäğatlären" tanuına bäyle dide.

Bekayi, şulay uq, söyläşülärneñ özleksez däwam itüen, ike yaq arasında xäbärlär häm tekst proyektları almaşu baruın belderde.

Bekayi söyläşülärdä qaralğan temalar arasında Ormuz buğazı, İrannıñ atom-töş programması, suğış öçen kompensatsiyälär, sanktsiyälärne beterü häm "İranğa häm töbäkkä qarşı suğışnı tulısınça tuqtatu" barlığın belderde.

Ul, şulay uq, İrannıñ AQŞnıñ êlekkege "yawızlığın" häm wäğdälären ütämäwen onıtmawın da östäp äytte.