Änkaradan belderülärençä Paqıstan, Soğud Ğaräbstanı, Misır häm Törkiyä arasında Yaqın Könçığıştağı suğış turında söyläşülär bu atna axırında Paqıstanda ütkärelergä mömkin.

Tışqı êşlär ministrı Xaqan Fidan "A Haber" kanalına birgän interv’yusında: "Bezneñ çınnan da planlaştırılğan oçraşuıbız bar ide; bez başta anı Törkiyädä ütkärergä niyatlägän idek... Läkin Paqıstan qardäşebez üz ilendä qalırğa tiyeş bulğanlıqtan, bez anı Paqıstanğa küçerdek", - dip östäde, "Bälki, bez bu atna axırında şunda oçraşırbız".

Söyläşülärdä möselmannar küpçelege bulğan dürt ilneñ tışqı êşlär ministrları qatnaşaçaq.

Comğa könne Germaniya tışqı eşlär ministrı Yoxann Vadeful, çığanağın äytmiçä, AQŞ häm İran arasında turıdan-turı oçraşunıñ "bik tizdän" Paqıstanda bulaçağın kötüen belderde.

İrannıñ "Tasnim" xäbär agentlığı isemsez çığanaqqa sıltama belän xäbär itüençä, Tähran Vaşington belän räsmi söyläşülär ütkärüen raslamasa da, İran AQŞ ilbaşı Donald Trampnıñ suğışnı tuqtatu buyınça 15 punkttan torğan planına üz cawabın İslamabad aşa citkerde.

İkençe yaqtan, Trumpnıñ maxsus wäkile Stiv Vitkoff comğa könne İrannıñ Yaqın Könçığıştağı ber aylıq suğışnı tuqtatu öçen Vaşington belän "bu atnada" söyläşülär ütkäräçägenä ışanuın äytte. Mayamidağı biznes-forumda İran söyläşüläre turındağı sorağa cawap birep, ul: "Bez bu atnada oçraşular bulaçaq dip uylıybız, bezneñ ömet bar", - dide.