Rusiyä belän Ukraina tön buyı ber-berenä höcümnär yasadı.

Ukraina Rusiyä başqalası Mäskäwgä kiñ qırlı pilotsız oçu apparatları höcümen oyıştırdı, ä Rusiyä köçläre Ukrainadağı sänäğat obyektlarına, ênergetika infrastrukturasına häm diñgez obyektlarına höcüm itte.

Mäskäw meri Sergey Sobyanin şimbä könne yasağan belderüendä, Rusiyä hawa saqlanu köçläreneñ tön urtasınnan birle başqala yağına bara torğan 195 Ukraina pilotsız oçu apparatın totqarlap yuq itüen xäbär itte.

Sobyanin ğadättän tış xällär  törkemnäreneñ bärep töşerelgän pilotsız oçu apparatları kisäklären tikşerüen belderde.

Rusiyäneñ grajdan aviaśiyäse oyışması “Rosaviaśiya” Mäskäwdäge Domodedovo häm Vnukovo aêroportlarında oçışlarnıñ tuqtatıluın xäbär itte.

Rusiyä saqlanu ministrlığı Rusiyä köçläreneñ tönlä Ukrainadağı obyektlarğa, şul isäptän ilneñ Krivoy Rog şähärendäge iñ zur qorıç zavodına häm Odessa portın qullanuçı köymälärgä zur külämle höcümnär yasaluın belderde.

“ArcelorMittal” qorıç gigantı qaramağındağı Krivoy Rog zavodı sentyabr ayında Rusiyäneñ berniçä ballistik raketa höcümennän soñ êşen tuqtatqan ide.

Şirkät älegä bu xaqtağı añlatma taläbenä cawap birmäde.

Rusiyä saqlanu ministrlığı, şulay uq, Jitomirdağı êlektr transformator stanśiyäsenä häm Zaporojyedağı qorıç zavodına höcüm yasaluın xäbär itte.

Ministrlıq Qara diñgezdä ber yök köymäseneñ dä höcümgä duçar buluın belderde häm köymäneñ Odessağa xärbi materiallar taşuın alğa sörde.

Rusiyä saqlanu ministrlığı şimbä könne soñraq yasağan belderüendä Luśktağı maşina remontlaw êşxanäsenä, ilneñ könbatışındağı Ternopol ölkäsendä urnaşqan êlektr transformator stanśiyäsenä häm Odessa şähärennän könyaqtağı tağın ber yök köymäsenä höcümnär yasaluın xäbär itte.

Rusiyä saqlanu ministrlığı älege köymäneñ xärbi materiallardan tış, grajdan häm xärbi maqsatlarda da qullanıla ala torğan äyberlär taşuın belderde.