Ğazzä xökümäteneñ matbuğat ofisı yäkşämbe könne yasağan belderüendä töbäkkä kön sayın yaqınça 450 tonna on kiräklegen,  läkin xäzerge waqıtta barı tik yaqınça 200 tonna  ğına on buluın citkerde.

Ofis İzrail  Ğazzädä on kiterüne çikläw  yulı belän planlaştırılğan açlıq säyäsäten köçäytä dip belderde.

Belderüdä, utnı tuqtatu kileşüe könenä 600 yök maşinası yärdämgä röxsät itsä dä, İzrail Ğazzägä genośid suğışına qadärge külämneñ nibarı 38%ın ğına birä diyelde.  

“World Central Kitchen” on yärdämen tuqtatqannan soñ krizis tagın da köçäyde. AQŞta urnaşqan yärdäm oyışması monnan alda kön sayın 20–30 tonna on birä ide, ä Bötendön’ya azıq-tölek programması köndälek cibärüne 300 tonnadan 200 tonnağa kimette. Başqa qayber oyışmalar da töbäkkä ikmäk häm on programmaların tuqtatqan dip xäbär itelde.

Ğazzädä 2,4 million xalıqnıñ yaqınça 1,9 millionı küçerelgän. İzrailneñ ike yıl däwam itkän suğışı waqıtında yortları cimerelgän bu keşelär bik awır şartlarda iske, tuzğan çatırlarda yäşilär.

2025 yılnıñ 10 oktyabrendä köçenä kergän utnı tuqtatuğa qaramastan, İzrailneñ gumanitar yärdämneñ, şul isäptän azıq-tölek, mediśina kiräk-yaraqları häm sıyınu urını cihazların kileşengän külämdä birelüenä röxsät itmäwe arqasında   tormış şartları sizelerlek yaxşırmadı.

İzrailneñ Ğazzädäge genośidında xäzergä qadär 72 meñnän artıq fälästinle üterelde, yaqınça 172 meñ keşe yaralandı; grajdannar infrastrukturasınıñ yaqınça 90%ı yuq itelde.