“Artemis II” missiyäsendäge astronavtlar Cir belän Ay arasındağı säfärneñ yartısın uzdı. NASA “Orion” ğäläm qorabınnan töşerelgän berençe Cir küreneşlären urtaqlaştı.
Astronavt Kristina Kox starttan yaqınça 2 kön, 5 säğät 24 minuttan soñ ireşelgän bu möhim êtapnıñ êkipajda urtaq söyeneç uyatuın äytte.
Kox: “Xäzerge waqıtta Aynı kürä alabız, çınnan da iskitkeç manzara,” dide.
NASA mäğlümatlarına kürä “Orion” ğäläm qorabı şimbä könne irtänge säğätlärdä Cirdän 229 meñ çaqrımnan artıq yıraqlaştı.
Urtaqlaşılğan räsemnärdä zäñgär okeannarı häm bolıt qatlamı belän Cirneñ tulı küreneşe urın ala.
Start häm Ay orbitsasına yünältüçe motor qabızu kebek kritik êtaplardan soñ astronavtlar sistemalarnı kontrol itte häm testlar uzdırdı.
Kanada astronavtı Djeremi Xansen Amerika astronavtları Kox, Viktor Glover häm Reyd Vaysman belän bergä missiyädä qatnaşa.
Êkipajnıñ kiläse atna başında Ay tiräli äylänep çığuı planlaştırıla. Bu – 50 yıldan artıq waqıttan soñ berênçe märtäbä başqarılğan missiyä.
NASA comğa könne yasağan açıqlawında barlıq sistemalarnıñ nıqlı êşläwen häm astronavtlarnıñ käyefe yaxşı buluın, ğailäläre belän êlemtädä toruların belderde.
Yaqınça 10 könlek missiyädä çirattagı kritik êtapnıñ yäkşämbene düşämbegä totaştıruçı töndä barlıqqa kilüe kötelä. Bu êtapta ğäläm qorabı Aynıñ gravitaśiya qırına keräçäk, anda anıñ gravitaśiyase Cirnekennän östenlek itä başlayaçaq.
