Törkiyä Cömhüriyäte ilbaşı Räcäp Täyyip Ärdoğan Misırnıñ Törkiyä, Soğud Ğaräbstanı häm Paqıstan arasında küptän tügel Mäkkädä imzalanğan saqlanu kileşüenä quşılırğa mömkinlegen häm monıñ kileşüneñ kollektiv iminlek qısaların kiñäytä aluın äytte.

Törkiyä ilbaşı Ärdoğan şimbä könne basılıp çıqqan “Äl-Cäzirä”gä” birgän interv'yusında Mäkkä kileşüeneñ başqa illär öçen dä açıq buluın häm kileşügä qul quyğan yaqlarnıñ qaysına bulsa da tışqı höcüm bulğan oçraqta koordinaśiyälängän ğamällärne küzdä totuın belderde.

Öç il arasında imzalanğan yaña kollektiv saqlanu kileşüendä  ber äğ’za ilgä qorallı höcüm barlıq äğzalarga qarata yasalğan höcüm dip sanala.

7 avgustta imzalanğan Mäkkä urtaq saqlanu kileşüe Tel-Aviv belän Vaşingtonnıñ İranğa qarşı urtaq suğışı, İzrailneñ Livanğa häm Süriyägä höcümnäre, şulay uq Fälästindäge genośid suğışı şartlarında regional’ tıyıp torunı häm strategik üzidaräne nığıtuğa yünältelgän.

İlbaşı Ärdoğan Änkaranıñ yabıluı berkemneñ dä mänfäğatlärenä xezmät itmägän Ormuz buğazın yañadan xäräkät öçen açu tırışlıqlarına östenlek birüen äytte.

 Ärdoğan şulay uq kiñ külämle töbäk konfliktın tuqtatu tırışlıqlarında Qatarnıñ möhim rol uynawın  assızıqladı.

 Süriyäneñ yalğız qalmayaçağın assızıqlağan ilbaşı Ärdoğan Törkiyäneñ ilneñ totrıqlılığın yaqlaw öçen qulınnan kilgänneñ barısın da êşläyäçägenä wäğdä birde häm aldağı çorda Süriyägä säfär qılunı planlaştıruın belderde.

 İzrailneñ Ğazzädäge genośidına da iğtibarnı yünältkän  ilbaşı Ärdoğan Änkaranıñ Ğazzäne yalğız qaldıra almawın assızıqlap, yärdämneñ  däwam itäçägen äytte häm İzrailne höcümnären däwam itterüdä ğayepläde.

 “Xamas”nıñ üz wäğdälären ütäwen, İzrailneñ isä suğışnı däwam itterüen beldergän Ärdoğan: “Törkiyä Ğazzäne yalğız qaldıra almıy häm anı yaqlaw öçen kiräkle bar närsäne dä êşläyäçäk” , – dide.

Awrupa Berlege belän bäyle bäyälämälärendä Ärdoğan  Awrupanıñ Törkiyäne qabul itü niyäte bulmawı säbäple äğzalıq östenlekle tügel dip belderde.

 İlbaşı Änkaranıñ törle regional häm xalıqara partnyelıqların küzdä totıp Awrupanıñ Törkiyäne çitläşterüdän axır çiktä  zıyan küräçägen äytte.

İlbaşı Ärdoğan şulay uq AQŞ ilbaşı Trampnıñ Törkiyägä F-35 xärbi  oçqıçların birergä wäğdä birüen häm Änkaranıñ bu wäğdäneñ ütälüen kötüen belderde.