Krista Payknıñ advokatları äytüençä, Tennessidağı uñışsız ülem cäzasın başqaru omtılışınnan soñ ber atnağa yaqın waqıt uzğaç, mäxküm xatın-qız üz añında häm söyläşä ala.
Advokatlar belderüendä ike doza üterüçe pentobarbital inyeksiyäseneñ Payknı ütermäwe häm qullarına citdi cäräxätlär yasawına qaramastan, anıñ äle dä boğawlanğan kileş qaluı citkerelde.
Belderüdä Payknıñ sälamätlek torışı bilgesez buluı äytelde.
30 sentyabr tönendä AQŞnıñ Tennessi ştatı Nêşvilldağı Riverbend yuğarı qurqınıçsızlıq törmäsendä inyeksiyä belän 50 yäşlek Payknıñ ülem cäzasın başqarırğa tırıştılar.
Maxsus törkem ozaq waqıt anıñ qan tamırın tabuda qıyınlıqlar kiçerä, häm Payknıñ advokatları äytüençä, kim digändä, cide ênä qullanılğan, häm alınğan ênälärneñ berse poçmaq yasap bögelgän. Annarı ike tulı doza pentobarbital birelgän.
İke qulı şeşkän, peşkän häm küpergän kileş Payknı aşığıç yärdäm maşinası belän Nêşvilldağı xastaxanägä alıp kitälär. Advokatlar monı venalarnıñ yarıluı arqasında tuqımalarğa yandıruçı darunıñ señüe belän bäyli
Gubernator Bill Li 2026 yılnıñ qalğan öleşendä ülem cäzaların başqarunı tuqtattı häm bäysez tikşerü ütkärergä quştı. Törmä başlığı bu waqıyğadan soñ wazıyfasınnan kitte.
Payk 1996 yıldan birle ülem cäzasına xökem itelgän totqın bulıp tora.
Payk, ike dustı belän bergä, 1995 yılnıñ ğıynwarında 19 yäşlek sıynıftaşı Kollin Slemmernı Nokswillda hönäri belem birü üzäge yanındağı urmanlıqqa aldap alıp kitkän häm anı yörgän yegetenä qarata könçelek arqasında başta säğatlär buyı ğazaplağan, annarı başına taş kisäge belän bärep ütergän.
Payk häm anıñ yegete berençe däräcädäge üterüdä ğayeple dip tabıla. Payk ülem cäzasına xökem itelä, ä yegete ğomerlek törmägä, küzätep torğan tağın ber yäşüsmer şartlı räweştä xökem itelä.
Payk Tennessi ştatında ülem cäzasına xökem itelgän totqınnar arasında berdänber xatın-qız.
